तोडकर हवामान अंदाज ; दोन कमी दाब क्षेत्र तयार, या जिल्यांना पावसाचा अलर्ट जारी.
विशेष प्रतिनिधी:
राज्यात थंडीची लाट कायम राहणार असून, पुढील सव्वा महिना मोठ्या पावसाची शक्यता नाही, असा अंदाज हवामान अभ्यासक तोडकर यांनी वर्तवला आहे. मात्र, बंगालच्या उपसागरातील हवामान बदलामुळे काही भागांत धुई व धुक्याचे सावट निर्माण होणार असल्याने द्राक्ष आणि पालेभाज्या उत्पादक शेतकऱ्यांनी सतर्क राहावे, असा इशारा त्यांनी दिला आहे.
१९-२० नोव्हेंबरपर्यंत थंडीची तीव्रता कायम
तोडकर यांनी दिलेल्या माहितीनुसार, राज्यात सध्या असलेली थंडीची लाट साधारणपणे १९ ते २० नोव्हेंबरपर्यंत कायम राहील. विशेषतः खानदेशात थंडीची तीव्रता सर्वाधिक असेल, जिथे तापमानाचा पारा १० अंश सेल्सिअसच्या आसपास राहण्याची शक्यता आहे. यासोबतच विदर्भ, छत्रपती संभाजीनगर, नाशिक, अहमदनगर, अकोला, अमरावती, चंद्रपूर, गोंदिया, भंडारा आणि यवतमाळ या जिल्ह्यांमध्येही तीव्र थंडीचा अनुभव येईल.
दक्षिणेकडील हवामान बदलाचा राज्यावर परिणाम
बंगालच्या उपसागरात तयार झालेल्या कमी दाबाच्या पट्ट्यामुळे १८ तारखेपासून तामिळनाडू आणि आंध्र प्रदेशमध्ये जोरदार पाऊस सुरू होईल. त्यानंतर दक्षिण कर्नाटकच्या काही भागांत हलका ते मध्यम पाऊस अपेक्षित आहे. या दक्षिणेकडील हवामान बदलाचा थेट परिणाम म्हणून महाराष्ट्रातील काही जिल्ह्यांमध्ये धुई आणि धुक्याचे सावट निर्माण होणार आहे.
द्राक्ष आणि पालेभाज्या उत्पादकांसाठी धोक्याचा इशारा
कमी दाब क्षेत्रातील वाऱ्यांमुळे थंडीत आणखी वाढ होऊन सांगली, सोलापूर, कोल्हापूर, सातारा, दक्षिण मराठवाडा, लातूर, चंद्रपूर आणि हिंगोली या भागांमध्ये १७ ते १८ तारखेपासून ‘खवल्या खवल्याचे’ किंवा लालसर रंगाचे आभाळ दिसू शकते. हे वातावरण थंड असले तरी, त्यामुळे निर्माण होणाऱ्या धुईचा धोका द्राक्ष आणि पालेभाज्यांसारख्या संवेदनशील पिकांना बसू शकतो. त्यामुळे, ज्या पिकांना धुई सहन होत नाही, अशा पिकांवर शेतकऱ्यांनी १६ किंवा १७ नोव्हेंबरच्या दरम्यान सौम्य बुरशीनाशकाची फवारणी करावी, असा महत्त्वाचा सल्ला तोडकर यांनी दिला आहे. धुईचा हा प्रभाव अंदाजे तीन ते चार दिवस टिकून राहील.
नोव्हेंबर कोरडा, डिसेंबरमध्ये तुरळक सरींची शक्यता
राज्यातील पावसाच्या स्थितीबद्दल दिलासादायक माहिती देताना ते म्हणाले की, पुढील सव्वा महिन्यासाठी महाराष्ट्रात मोठ्या पावसाचा कोणताही धोका नाही आणि हवामान निरभ्र राहील. नोव्हेंबर महिना कोरडा जाईल, मात्र डिसेंबर महिन्यात काही प्रमाणात ढगाळ हवामान निर्माण होऊन तुरळक ठिकाणी मोठ्या सरी कोसळण्याची शक्यता आहे.
