हवामान अंदाज : राज्याच्या बहुतांश भागात सध्या थंडीचा कडाका काहीसा कमी झाला आहे. याचे मुख्य कारण म्हणजे राज्यात पावसाला पोषक असे हवामान तयार झाले आहे. कोकण आणि दक्षिण मध्य महाराष्ट्रातील काही भागांमध्ये विजांच्या कडकडाटासह हलक्या पावसाची शक्यता वर्तवण्यात आली आहे. या हवामान बदलामुळे पुढील तीन दिवसांसाठी थंडीचे प्रमाण कमी राहू शकते असा अंदाज हवामान विभागाने दिला आहे. राज्यातील अनेक भागांत ढगाळ हवामानामुळे किमान तापमानात काहीशी वाढ झाली आहे, ज्यामुळे थंडीची तीव्रता ओसरली आहे.
हवामान विभागाने दिलेल्या अंदाजानुसार, कोकण आणि दक्षिण मध्य महाराष्ट्रातील काही जिल्ह्यांमध्ये पावसाची शक्यता आहे. आज सिंधुदुर्ग, कोल्हापूर आणि सांगली जिल्ह्यांमध्ये तुरळक ठिकाणी विजांसह हलक्या पावसाची शक्यता वर्तवण्यात आली आहे. याव्यतिरिक्त, पुढील दोन दिवस म्हणजेच उद्या आणि सोमवारी देखील पावसाचा अंदाज आहे.
