रामचंद्र साबळे हवामान अंदाज ; महाराष्ट्रावर अधिक हवेचा दाब असल्याने संपूर्ण विदर्भ, मराठवाडा आणि उत्तर महाराष्ट्रात थंडीचे प्रमाण व प्राबल्य अधिक राहील. हवेचा दाब उत्तरेस १०१६ पास्कलपर्यंत आणि दक्षिणेस १०१२ ते १०१४ पास्कलपर्यंत टिकून राहील. या उच्च दाबाच्या पट्ट्यामुळे येत्या काही दिवसांत थंडी कायम राहणार आहे. याउलट, दक्षिण-पश्चिम महाराष्ट्र आणि कोकण या भागांत मात्र थंडीचे प्रमाण मध्यम स्वरूपात अनुभवायला मिळेल.
वातावरणातील बदलामुळे थंडीचा प्रभाव जरी वाढलेला असला तरी, हवेचा दाब कमी होताच (१०१० हेप्टापास्कलपर्यंत) थंडीची तीव्रता आपोआप कमी होईल असा अंदाज आहे. एकंदर, हा हंगाम हवामान बदलामुळे (क्लायमेट चेंज) खूप प्रभावित झाला आहे आणि फेब्रुवारी ते मार्चच्या सुरुवातीपर्यंत म्हणजेच साधारणपणे ३-४ मार्चपर्यंत थंडी चांगली टिकून राहण्याची शक्यता आहे. सध्या तरी संपूर्ण महाराष्ट्रात पावसाची कोणतीही शक्यता नाही. तथापि, समुद्रातील काही घडामोडी वातावरणावर परिणाम करू शकतात.
रामचंद्र साबळे यांच्या माहितीनुसार श्रीलंकेजवळ लहान चक्रीवादळ तयार होण्याची शक्यता असून ते बंगालच्या उपसागरातून उत्तरेच्या दिशेने सरकत झारखंड व पश्चिम बंगालकडे जाईल. या चक्रीवादळाच्या प्रभावामुळे महाराष्ट्राच्या हवामानात अधूनमधून अल्पशा प्रमाणात ढगाळ हवामान राहणे शक्य आहे.
अरबी समुद्र, बंगालचा उपसागर आणि हिंदी महासागराच्या पृष्ठभागाचे तापमान स्थिर (२९°C) असल्याने हवामानात सध्या स्थिरता दिसून येत आहे. तसेच, सध्या पॅसिफिक महासागराच्या तापमानातील फरकामुळे एल निनो किंवा ला निना चा कोणताही मोठा प्रभाव जाणवणार नाही.
या हवामानाला अनुकूल असा शेतकऱ्यांसाठी महत्त्वाचा कृषी सल्ला देखील साबळेंकडून देण्यात आला आहे. ज्या शेतकऱ्यांची गव्हाची पेरणी राहिली असेल त्यांनी ती तातडीने उरकून घ्यावी. गव्हाच्या पिकास दर २१ दिवसांनी पाणी देणे आवश्यक आहे, कारण प्रत्येक २१ दिवसांनी पिकाच्या वाढीची अवस्था बदलत असते.
हरभरा पिकास फुलधारणा (फुलोऱ्यावर असताना) आणि घाटे भरण्याच्या वेळी पाणी द्यावे. थंडीमुळे जनावरांना शक्यतो शेडमध्ये बांधावे आणि आवश्यक असल्यास बाजूने झाप लावून त्यांची काळजी घ्यावी. तूर पिकाला सध्या स्थिर हवामानामुळे किडींचा प्रादुर्भाव होण्याची शक्यता आहे, त्यामुळे शेंगा पोकळणाऱ्या आळीपासून संरक्षण करणे हे मुख्य काम राहील. सर्वात महत्त्वाचे म्हणजे, किमान तापमान कमी आणि जमिनीचे तापमान थंड असल्यामुळे डिसेंबर महिन्यात उसाची लागवड करू नये. ऊस लागवड करण्यासाठी १४ जानेवारीनंतर (सुरू उसाची लागवड) योग्य नियोजन करावे.
