पीएम किसान सन्मान निधी योजनेचा २१वा हप्ता वितरित झाल्यानंतर, मोठ्या संख्येने शेतकऱ्यांच्या मनात प्रश्न आहे की त्यांच्या खात्यात हा हप्ता का जमा झाला नाही. देशभरात नऊ कोटींहून अधिक शेतकऱ्यांच्या खात्यात १८ हजार कोटी रुपयांचे वितरण करण्यात आले असले तरी, महाराष्ट्रातील तब्बल २ लाख ४८ हजार ३२ शेतकरी या योजनेच्या २१व्या हप्त्यापासून वंचित राहिले आहेत. राज्यामध्ये लाभार्थी संख्या कमी झाल्यामुळे अनेक प्रश्न निर्माण झाले असून, नेमके कोणते शेतकरी अपात्र ठरले, याबद्दलची माहिती देण्यात आली आहे.
लाभार्थ्यांच्या संख्येत झालेली ही मोठी घट स्पष्टपणे दिसून येते. पीएम किसानचा २०वा हप्ता वितरित झाला तेव्हा राज्यातील ९२ लाख ८९ हजार २७३ शेतकऱ्यांना लाभ मिळाला होता. यानंतर नमो शेतकरी महासन्मान निधी योजनेचा हप्ता देखील ९१ लाख ६५ हजार १५६ लाभार्थ्यांना वितरित करण्यात आला होता. मात्र, २१व्या हप्त्यात लाभार्थ्यांची संख्या ९० लाख ४१ हजार २४१ पर्यंत खाली आली, ज्यासाठी १८०८ कोटी रुपयांचा निधी वितरित झाला. याचा अर्थ २०व्या आणि २१व्या हप्त्याच्या दरम्यान २ लाख ४८ हजार ३२ शेतकरी अपात्र ठरवण्यात आले आहेत.
